परिचय:                                                                                हृदयशास्त्र हृदय तथा रक्त नलीहरुसँग सम्बन्धित चिकित्साको एक क्षेत्र हो। यस क्षेत्रमा विशिष्टिकरण गर्ने चिकित्सकहरुलाई हृदयशास्त्री भनिन्छ। हृदयशास्त्र दुई संस्कृत शब्द हृदय (मुटु) र शास्त्र मिलेर बनेको शब्द हो। यो क्षेत्रलाई कन्जेनाइटल हृदय डिफेक्ट, कोरोनरी धमनी रोग, हृदयघात, भाल्भुलर हृदय रोग आदिमा विभाजित गर्न सकिन्छ।

                                          मुटु रोग भनेको के हो ?                                                                     मुटु र रक्तनलीसम्बन्धी रोग गम्भीर प्रकारका  हुन्छन्। त्यसबाट मानिसको तत्काल मृत्युसमेत हुन सक्छ। उपचार खर्चिलो र जटिल छ। तर, रोगबाट बच्ने उपाय भने अपेक्षाकृत सस्तो, सजिलो र सुलभ छन्। नेपालमा मुटुरोग बढ्ने क्रममा छ। हाल करिब १५ प्रतिशत अर्थात् ४५ लाख जनतालाई कुनै न कुनै प्रकारको मुटुरोग भएको अनुमान गरिएको छ। मुटु रोगबाट हुने मृत्युको संख्या कुल मृत्युको २५ प्रतिशत रहेको छ । नेपालमा १० वर्षयता मुटुरोगीहरूको संख्यामा पाँच गुणाले वृद्धि भएको छ। हाल नेपालमा १८ वर्ष उमेर माथिका करिब २० प्रतिशतलाई उच्च रक्तचाप, ३ प्रतिशतलाई कोरोनरी मुटुको रोग, १० प्रतिशतलाई मधुमेह छ। यस्तै स्कुल जाने उमेरका करिब १.२ प्रतिशतलाई बाथमुटुको रोग र त्यत्ति नै अनुपातमा जन्मजात मुटुको रोग छ। मटु रोगको अस्पतालमा भर्ना भएका मध्ये कारोनरी मुटु रोगी ३९ प्रतिशत, उच्च रक्तचाप पीडित ७,  बाथ मुटु रोगी २० र जन्मजात मुटु रोगी ६ प्रतिशत रहेका छन् ।