काठमाडौं–१७ वर्षदेखि चलिरहेको राष्ट्रिय पोलियो खोप अभियानको औपचारिक उद्घाटन कार्यक्रममा सहभागी हुन स्वास्थ्य मन्त्रालय र स्वास्थ्य सेवा विभागका उच्च अधिकारीको लर्को वीरगञ्ज पुगेको छ ।

 

शनिबार सुरु हुने पोलियो थोपा खुवाउने कार्यक्रमको शुक्रबारै वीरगंजमा स्वास्थ्य मन्त्री विद्यधर मल्लिकले उद्घाटन गर्दैछन् । उद्घाटन कार्यक्रम अनावश्यक रुपमा जिल्लामा गरिनु र मन्त्रालय र विभागका अधिकांश कर्मचारीलाई उपस्थित हुन उर्दी जारी गर्नु सरकारी खर्चको दुरुपयोग भएको मन्त्रालयकै अधिकारीहरुको टिप्पणी छ ।

 

नयाँ सरकार बन्ने क्रममा स्वास्थ्य मन्त्री मल्लिकले ‘हाकिमहरुको चाकडी कम हुँदै गएको पाएपछि शक्तिशाली देखाउँन सबै हाकीमलाई उपस्थित हुनै पर्ने उर्दी जारी गरेको’ मन्त्रालयको उच्च स्रोतको भनाई छ । स्वास्थ्य मन्त्रीको ठाडो निर्देशनपछि अधिकांश हाकिम कामै नभएपनि वीरगञ्ज पुगेका हुन् । ‘यहाँ मैले जो–जो देखेको छु, ती मध्ये ९५ प्रतिशतको यहाँ कामै थिएन।’ वीरगञ्जमा रहेका स्वास्थ्यकै एक उच्च अधिकारीले भने, ‘यहाँ हेर्दा लाग्छ नाटक भइरहेको छ ।’

 

स्वास्थ्य मन्त्रालयका सचिव डा.प्रविण मिश्र वीरगंज जाने भनेर टिकटसमेत लिइसकेपछि सन्चो नभएको भन्दै गएनन् । सामान्य रुघा लागेपनि मन्त्रीले अनावश्यक रुपमा धेरैलाई बोलाएको भन्दै असतुष्ट रहेका उनले ‘बिरामीको वहानामा कार्यक्रम बहिष्कार गरेको बुझाई केही उच्च अधिकारीको छ । ‘हिजो मन्त्रालय आउँदासम्म सचिवलाई केही भएको थिएन्, आज बिरामी भएको सुनियो ।’ मन्त्रालय स्रोतले भन्यो, ‘विदेश धाइरहन सक्ने सचिव, रुघा लाग्दैमा घरमै सुत्नुपर्ने थिएन, असन्तुष्ट भएरै हो ।’

 

मन्त्रालय र विभागका दशौ, एघारौ र बा¥हौं तहका अधिकांश चिकित्सक एवं कर्मचारी वीरगञ्जमा छन् । बाल स्वास्थ्य महाशाखाका भने सबैजसो कर्मचारी वीरगञ्ज पुगेका छन् । वीरगंज पुग्नेमा १२ औ तहकी डा.शिला बर्मा, विभागका महानिर्देशक लखनलाल शाहसमेत छन् । मन्त्रालयका डा.रोजेनसुन्दर श्रेष्ठ, उपसचिवहरु मुकुन्द निरौला र केदार अधिकारीलाई भने सचिवले रोकेको बुझिएको छ । ‘यसो घुम्न हुन्थ्यो, सचिवले नजा भने ।’ एक अधिकारी भने ।

 

त्यसैगरी विभागबाट बाल स्वास्थ्य महाशाखाका निर्देशक डा.सेनेन्द्रराज उप्रेति, एचआइभी केन्द्रका निर्देशक डा.नरेशप्रताप केसी, परिवार स्वास्थ्यकी निर्देशक डा.किरण रेग्मी, इडिसिडी निर्देशक डा.बाबुराम मरासैनीलगायत पनि वीरगन्ज पुगेका छन् । केही हाकीम भने मन्त्रीसँग नजिक हुने अवसर पाइने भएकाले वीरगन्ज गएको जनाइएको छ ।

 

तीन वर्षदेखि कुनै पनि संक्रमण नभेटिएपछि दक्षिणपूर्वी एसिया क्षेत्रका सम्पूर्ण देश नै आगामी फेब्रुअरी १२ देखि पोलियो संक्रमण शून्य देश घोषित हुँदैछन् । त्यसलगत्तै नेपालमा अन्तर्राष्ट्रिय टोली आएर शून्य प्रमाणीकरण गरी पोलियोमुक्त राष्ट्र घोषणा गरिनेछ । यस्तो अवस्थामा बालबालिकालाई पोलिया थोपा खुवाउनु जरुरी  भएपनि भव्य उद्घाटन र  हाकीमको लर्को अनावश्यक र अनियमितता भएको वरिष्ठ चिकित्सकहरुको भनाई छ ।

 

१५ औ राष्ट्रिय पोलियो खोप अभियान शनिबार सुरु हुँदैछ । पहिलो चरणमा पुष ६ गते तराई र पहाडका ६८  जिल्लामा र दोस्रो चरणमा चैत ८ र वैशाख १३ गते ७ हिमाली जिल्लाका ५ वर्ष मुनिका सम्पूर्ण बालबालिकालाई पोलियो थोपा खुवाइने कार्यक्रम स्वास्थ्य मन्त्रालयले घोषणा गरेको छ । १७ वर्षदेखि जारी अभियान गत वर्ष भने खोप अभावका कारण सञ्चालन भएको थिएन् । अभियानमार्फत् मुलुकभरका करिव ४२ लाख २६ हजार बालबालिकालाई थोपा खुवाइनेछ ।